الكلبة

انا عمري ما كتبت بوستات ولا اتكلمت ف اي حاجه بس انا اللي شوفته النهارده مهزله بجد .. الكلبه دي كانت ولدت عندي في مدخل العماره ٩ جراوي صغيرين و كنا بنأكلها احنا و الجيران عادي حتي اولاد جيراني اللي كانوا بيخافوا كانوا بس بيتجنبوها وخلاص .. امبارح بليل سمعناها بتأن و تعوي في المدخل افتكرناها جعانه او تعبانه جوزي نزل حطلها اكل و مايه و بص علي ولادها ملقاهمش ، بعدها دورنا لقينا واحد بس و كان حرفيا مدبوح و مدفون هي اللي طلعته لينا من تحت التراب !!! علي اعتقاد ان كلهم ماتوا و بعد تدوير و حسبنه كتير علي اللي عمل كده قولنا خلاص و رجعنا البيت ، بعدها لقينا ناس من جيراننا بيحاولوا يفتحوا بلاعه المدخل اللي كانت قطعه رخام مقفوله تماما بس فيها حته كسر كنت انا و جوزي قافلينها قبل كده علشان محدش من الكلاب يقع ، و الغريب ان جوزي لما نزل اول مره كانت مقفوله زي ما قفلناها عادي .. نزل يشوف في ايه لقي ان حد رمي ٣ كلاب في البلاعه و قفل عليهم .. ده غير اتنين كمان لقيناهم مرميين في حته بعيد ، اطفال المنطقه اللي عارفين الكلبه دي هما اللي جابوهم .. بعد ما طلعوهم و خلاص ، من شويه سمعنا الكلاب بتإن نزلنا لقينا واحد منهم حرفيا بيموت ، اخدناهم قولنا نحميهم و نعالجهم لحد ما علي الاقل يشدوا حيلهم شويه ، و انا بحميهم لقيت منهم واحد تاني مدبوح برضوا بس مماتش !! رقبته كلها متعوره ، و واحد تاني عينه مقفوله و جسمه ضعيف و بيموت .. و اطفال المنطقه اللي جابولنا الكلبين التانيين بيقولوا ان في اتنين غيرهم لقوهم مشنوقين علي شجره !!! هي الناس اتجننت ؟ طب دول عملولهم ايه دول بيبيهات، ولا هجموا علي حد ولا اذوا حد ، ولا حتي امهم مؤذيه ! انا عندي انهيار عصبي من الصبح من وقت ما اخدت بالي ان الكلب الصغير رقبته كلها مفتوحه .. و بحاول اعالجهم و ربنا يدينا القدره و الصبر يارب اننا نقدر علي ده .. لو حد عنده اي طريقه يساعد بيها ياريت .. لأن ده هيبقي عبء كبير اوي .. حتي لو دعوه والله هتفرق في الوضع ده

“ أمنية الكلبة الوحيدة أن يجد عائلة مدى الحياة.